MJC du Laü - 81 avenue du Loup - 64000 PAU - Tél. : 06 22 11 67 43 - ibg.secretariat@orange.fr

QUE BAM PELA LOU PORC

0

Qu’éy oéy lou die : lou porc qu’éy beroy ardoun, peladé. Qu’éy tabé la sesoû, permou de counserba la car. La familhe e lous besîs que soun arribats enta da la mâ. Tribalh que y a. D’abor ha cauha l’aygue, que cau téms ta la ha bouri. Que bam atrapa lou porc, gaha-u l’û à la pate, l’àut? à la coude, gn’àut? à ûe aurélhe. Ço de méy machan ha, qu’éy de passa û nout escourredé à la came de darrè, dap û picot à la ganurre, ha-u abança la mèyt. Û cop en place que-u hiquen sus lou cap û pistoulét dap ûe punte qui ba tau cerbèt. Estarramounit, nou-s esganurre pas méy e lou tuàyr? que l’escane dap û sacat de ganibét? au cot.

   La sanc que chourre héns lou herrat oun la daune l’arpare (recueille). Trés bouhéts enhouliats, en espernabate que hè las darrères estrèytes. Hicat héns la mèyt, lou porc qu’éy plâ arrousat d’aygue bouriénte, birouleyat per dues cadénes enta-u rasa lou péu dap quoàt? raspes. Pròpi, passat au chalum, lous òmis que-u hèn passa sus ûe escale qui quilhen autalèu. Adare que-s y pot aleda : « Tau porc penut, que-s y béu û truc ! » La daune qu’arribe dap lous béyres e lou pintoû. E drin de hum de toubac qu’escalouréch lou nas.

   Lou peladou, dap la gran guinabéte, la sègue, la destrau, que ba aubri lou bént?. Que couménce per coupa e nouda la pus. Puch que hè daban, que tire la bouhigue e lou pichadé. Autescops, la bouhigue bouhade que serbibe de baloû entaus maynats. Lou pichadé, secat, qu’undabe las arresègues e lou passe-pertout. Entau hìdy?, que cau tira lou hèu dap soégn. Dap û linçòu blanc, las hémnes que biénen arpara la tripalhe. Û cop desgrechats lous budèts, qu’aneran laba lou bént?, grata la berréte au coutèt. Entertan lou cap qu’éy talhucat à tros. Lou goula e las courades, plâ labats e penuts, que-s eschugueran dinque douma.

   À l’esguit deu die, l’espeçadou qu’at estroussiquera tout : lous yamboûs e lous camots, la chingarre, drin de goula enta-u ha seca ta l’estiu, beroy salat e peberat. L’esquiau que sera enta la garbure, lou coustoû enta ha rousti, lou camot dap mounyétes.

 Héns la cautère que ba garlapa û boulhoû dap lou cap, la méusse, las courades e las pèts, assaburats de sau, péb?, pìmbou, clabét de canèle (clou de girofle), pourréts, carrotes, cébes, alh, nabéts. Tout aco, coéyt e talhucat, dap la sanc que hara tripes. « De drét ou de tort, trédz? tripes qu’a lou porc ».

  La car màgr?, dap alh, sau e péb? héns lou budèt prim que hara saucisses e pus. Assaburats atau tabé, lou hìdy? e lou goula que-s en aneran en « patè ». Au cap de quoàt? dies, la car, drin salade, que sera coéyte déns la grèche : lou co, la loéngue, las lounyes, las saucisses que-s en aneran ta la toupîe.

  De la cautère qu’amasseran lous grechoûs, e que hiqueran à despart lou grechùmi qui dara boune sabrou à la broye. Deu mus dinque la coude tout qu’éy boû héns lou pourquét.

  Hère de tribalh en û cop, més b’éy l’aucasioû d’amassa moùnd? à case, minya carboade, ha à las cartes, canta… puch que sabém que y abera hartère enta l’anade, en penderilhe, à las toupîes ou dehéns l’armàri tourradé.

Yanéte dou Moulî

Partager sur :

Infos de l'auteur

Laisser une réponse