MJC du Laü - 81 avenue du Loup - 64000 PAU - Tél. : 06 22 11 67 43 - ibg.secretariat@orange.fr

LOU COUCUT

0

Qu’èy toustém entenut dìsẹ que, ta Sén Barnabè, lou coucut que-s hè esparbè. E sabét perqué ?

Ûe biélhe istoère. Ne sèy pas méy quoan ère, ni tapoc héns quin loc, que countaben qu’ûe pigue e-s abè atrassat û yoén coucut qui s’abè troubat soulét, chéns pay ni may.

Que l’apasturabe, que-u s’enguiserabe, més, en tournes, que-u hasè tribalha : cerca penalhs de hé taus nids, ana coélhẹ yoyes e àutẹs causes qui luséchẹn, pana cerises, césẹs, arragues héns lous casaus. Més û die, la pigue que-u demanda (demandè) de gaha û pioc.

Aco qu’ère trop tau coucut. Hart de-s fatiga à ha serbìcis, ne boulou pas. La pigue, hole de malìci que-u hica (hiquè) dehore à cops d’ales e en l’espernican.

Lou pràubẹ, tout estabanit de doulou, que s’en ana (anè) loégn, en se ha (han) la proumésse de-s benya. Loégn… lhèu dinqu’à la balée d’Aussau ?… Oun trouba (troubè) ûe bère hade qui-u cambia (cambiè) en esparbè ta paréchẹ méy hort e méy bèth que la pigue.

Û die, decap à l’estiu, qu’èri dap lou mé béu-ray cassadou. Que bedouy passa û ausèth héns lou blu dou cèu.

− Espie, Yan-Pèyre, û coucut !

− Ah, noû, aco, qu’éy û esparbè.

− Qu’éy mediche cause, Sén Barnabè qu’éy passat, adare lou coucut qu’éy       esparbè.

− Ah, noû, qu’an mediche mustre més û coucut qu’éy sourtit coucut e que-n damoure. Aco qu’éy û esparbè, tirat d’û oéu d’esparbè. Gahe-t lou dicciounàri que bas bédẹ.

Que cerquèy e que troubèy : Coucou, oiseau grimpeur insectivore; Épervier, oiseau de proie comme les faucons.

Que-n abi lou cap tout mesclat.

− Més, toutû, Yan-Pèyre, que bòu dìsẹ tout aço ?

− Que bòu dìsẹ que, d’are-endaban, que-t abiseras de nou pas crédẹ las istoères troumpibes qui an hèyt lou moùndẹ !…

Amics, si sabét la bertat, que la me caleré dìsẹ… Toutû, quàuquẹ cop, las pigues ahamiades que panen û pioc à la clouque. Perqué lou coucut qui nou troubaré (trouberé) pas prou de barbòus nou haré (heré) pas pariè… chéns esta coumandat per la pigue ?

Marielle LUCATS

Yocs Flouraus – 2009

Partager sur :

Infos de l'auteur

Laisser une réponse