E serét û trachaman ? Qu’èt lou soul à poùdẹ respoùnẹ. Que-m diserat, segu, que noû … e que sera ûe bère mensounye ! Trachamans, que-n cau, més pas de touts. Lous qui hèn serbìci, que soun lous qui counten hèytes fausses, noû pas sus lous àutẹs més sus éths-medichs. Bantariòus que cerquen à estouna en countan causes qui ne-us soun yamés arribades. Més, abisat-pe, ne cau pas descouradya û bantariòu en se trufan de ço qui dits.
Au coùntrẹ, que cau ha semblans de-u crédẹ, aco que l’encouradye e que perseguira à-p deberti dap ço qui-s enbénte. À Sént-Espedit que-n y a û deus boûs, Artur lou trachaman ou lou tracassiè coum dìsẹn. Que-u hè gay d’estouna lous qui soun à l’aubèrye de (deu) Sidòni, nou pèrdin (pèrdẹn) pas las soûes paraules e que-u hèn crédẹ que harlapen tout ço qui counte coum la hèyte d’aquéths dus lapîs qui a héns (déns) las lapinères.
Que soun tan bèths e machans que-us surbélhe dap la carabine à la mâ quoan la soûe hémne e-us porte de qué minya.
– « Qu’an l’oélh machan e que me-n meschìdi. »
– « E soun atau dap las lapines ? » ce-u demande û empertinén.
– « Ne-t trùfẹs pas, que-t y bouleri bédẹ ! »
Per bèth sé, (l’) Artur qu’éntre à l’aubèrye dap dus militàris, dus anglés qui a trebucat héns (déns) lou bosc de la coumune.
– « Que-m an hèyt coumprénẹ que-s èren esbarrits en manubres, labéts que-us èy amassats héns (déns) la remorque qui-m serbéch entaus céps. »
(L’) Artur que l’atéle au soû velo enta carreya dedzenats de quilos de céps qui amasse à la sesoû. Lous Anglés que bébẹn û cop, que saluden la coumpagnie e que se-n ban. Chic de téms adarroun, Artur qu’éy fièr d’amucha ûe létre qui a recebut deu counsul d’Angletèrre à Bourdèu.
– « Bràbẹ Moussû, la noùstẹ Réyne que-p arremercie d’abé aydat dus militàris esbarrits capbath deus boscs. Atau qu’an poudut tourna trouba lou lou reyimén. » Touts que truquen las mâs enta (l’) Artur. (Lou) Sidòni que ba cerca méy de bî. Per û cop qu’a dit la bertat. Quio, permou qu’aquére hèyte qu’éy bertadère, medich si (s’) éy arribade à û trachaman au Bos(c)-d’Arros.
Û DE LAS CADIÈRES – 26/10/2017
